Тщание имущи сообразно имени твоему, тезоименитая, равноимянную тебе веру в сожительство избрала еси, Параскево победоносная, темже изливаеши исцеления, и молишися о душах наших.
Страстотерпице, вернии, песнь Параскеве, придите, согласно воспоим, облиставает бо чудесы в мире, отгоняющи прелести тьму, подающи верным благодать независтную, зовущим: радуйся, мученице многострадальная.
Кондак 1
Избранной невесте Христовой, святей преподобномученице Параскеве, с верой и любовию похвальное пение, яко благой целительнице приносим; ты же, страстотерпице Христова, милостивно нам приклонися, подвиги и страдания твоя воспевающим, и от всяких бед свобода ны, со умилением зовущия ти: Радуйся, преподобномученице Христова, Параскево всеславная.
Радуйся, ангельским проречением провозвещенная.
Радуйся, неплодие родителей своих рождением твоим разрешившая.
Радуйся, многими молитвами у Бога испрошенная.
Радуйся, всех в молитве не унывати научившая.
Радуйся, благаго корене святое прозябление.
Радуйся, Христолюбивых отца и матере дщерь боголюбезная.
Радуйся, от чрева матерня на служение Христу предызбранная.
Радуйся, Жениху Нетленному девство свое обручившая.
Радуйся, божественнаго к людям милосердия явление.
Радуйся, молитвы кадило непрестанное.
Радуйся, ленивых обличение.
Радуйся, сумняшихся благое утверждение.
Радуйся, преподобномученице Христова, Параскево всеславная.
Видевше мира суету и непостоянство, Параскево богомудрая, от мира удалитися вожделела еси, да возможеши непрестанно благоугождати Христу Богу, и невозбранно иго Его благое понести, в молитвах же присно прилежати, зовуще Ему: Аллилуиа.
Разум небесный стяжавши, преподобномученице Параскево, по кончине родителей твоих вся имения нищим раздала еси, в путь исповедания Христова усердно потекши. Того ради восхваляем тя сице:
Радуйся, красотою душевною просиявшая.
Радуйся, о телесной доброте небрегшая.
Радуйся, благодатию Святаго Духа душу твою исполнившая.
Радуйся, Тогожде благодатию верным благодеющая.
Радуйся, Бога Истиннаго дерзновенно проповедавшая.
Радуйся, исповедания имене Его не убоявшаяся.
Радуйся, исповеднице Христова непоколебимая.
Радуйся, страстотерпице Иисусова многострадальная.
Радуйся, благовестнице Евангелия богомудрая.
Радуйся, заповедей Господних исполнительнице преславная.
Радуйся, добродетелей многих вместилище.
Радуйся, Духа Святаго жилище.
Радуйся, преподобномученице Христова, Параскево всеславная.
Имела еси душу мужеством о Христе преисполненную, Параскево богомудрая, мучителей нечестивых крепко посрамила еси. Темже мучительству их посмеявающеся, аки в чуждем телеси бывши, Христа ради вся претерпела еси, нас же научила еси воспевати ти сицевая:
Радуйся, громогласная Божия исповеднице.
Радуйся, Сладчайшаго Иисуса невесто прекрасная.
Радуйся, девство непорочное Ему в дар принесшая.
Радуйся, кровь твою за Него пролиявшая.
Радуйся, пред судии и мучители имя Его небоязненно исповедавшая.
Радуйся, свидетелей мучений твоих к вере приведшая.
Радуйся, в молитвах наших теплое прибежище.
Радуйся, нашего на Господа упования утверждение.
Радуйся, любителей временных наслаждений обличение.
Радуйся, горняя ищущих ободрение.
Радуйся, в борениих сущим помощнице.
Радуйся, обидимым благое утешение.
Радуйся, преподобномученице Христова, Параскево всеславная.
Бурею неверия одержимый царь Антонин удивися, егда тя виде в котле кипящем невредиму, егда же руце свои, от котла исполнивши, на лице мучителя повергла еси, той опален вопияше: «Помилуй мя, рабо истиннаго Бога, и даждь ми свет очей моих, да уверую в Бога, Егоже ты проповедуеши и пою Ему купно с тобою: Аллилуиа».
Слышавше многая и лютая страдания твоя, Параскево преславная, и мы, грешнии, терпению твоему умиленно дивимся, како и железо разженное на главе твоей носила еси, и биения лютая многажды претерпела еси. Темже, тя ублажающе, зовем:
Радуйся, язвы Господа Иисуса на теле твоем носившая.
Радуйся, Того единаго возлюбившая.
Радуйся, о укрепляющем тя Господе вся возмогшая.
Радуйся, чудеса многая во уверение идолослужителей сотворившая.
Радуйся, терпением мучителей твоих препобедившая.
Радуйся, невернаго царя покаравшая.
Радуйся, исцеление тому милостиво подавшая.
Радуйся, среди народа римскаго Имя Христово вельми прославившая.
Радуйся, всем языком образ долготерпения явившая.
Радуйся, всем родом исполнение веры показавшая.
Радуйся, восхваляющим подвиги твоя благодатное просвещение дарующая.
Радуйся, о прощении грехов их Господа умоляющая.
Радуйся, преподобномученице Христова, Параскево всеславная.
Видевше людие преславное чудо твое, преподобномученице, како дракона великаго имени Божия призыванием поразила еси, во Христа абие увероваша, глаголюще ти:
Радуйся, Господа твоего страданьми и чудесы прославившая.
Радуйся, спасения многих душ человеческих виновнице.
Радуйся, добропобедная страстотерпице Христова.
Радуйся, многочудесная свидетельнице Иисусова.
Радуйся, насадительнице веры истинныя.
Радуйся, милостивая целительнице недугов человеческих.
Радуйся, грешныя люди любовию твоею не оставившая.
Радуйся, о просвещении душ наших возревновавшая.
Радуйся, труды многия Евангелия ради подъявшая.
Радуйся, сего ради великою во Царствии Небеснем пронареченная.
Радуйся, лика девственниц украшение.
Радуйся, полка мученическаго похвало.
Радуйся, преподобномученице Христова, Параскево всеславная.
Проповедником Христовым, богоносным Апостолом верно подражала еси, Параскево многострадальная, и в проповедании Евангелия чрез все житие твое подвизалася еси, человеки во спасение уловляющи. Темже чудес дарованием от Христа Бога обогатилася еси, о нихже и невернии в веру приидоша и воспеша Богу: Аллилуиа.
Возсияла еси, яко звезда, на тверди Церкви Христовой, Параскево добропобедная, и всем нам образом жития твоего светиши ясно, темже верою и любовию память твою святую почитающе, вопием ти:
Радуйся, подвижнице Божия, постом и молитвою воспитанная.
Радуйся, голубице непорочная, кротости и незлобия преисполненная.
Радуйся, за своя мучители молитвы Господеви приносившая.
Радуйся, Христу Спасителю тем уподобившаяся.
Радуйся, злобу врагов добром препобедившая.
Радуйся, Стефана первомученика венцу поревновавшая.
Радуйся, Евангельских заповедей верная исполнительнице.
Радуйся, неверия грозная обличительнице.
Радуйся, кающимся прощения от Бога скорая подательнице.
Радуйся, верных ко спасению добрая наставнице.
Радуйся, сердца наша умиления исполняющая.
Радуйся, помыслы наша к Богу возносящая.
Радуйся, преподобномученице Христова, Параскево всеславная.
Хотяши душу свою за Христа положити, Его ради многая мучения претерпевши, от нечестиваго мучителя Тарасия во главу усечена была еси; от Господа же венец нетленный на главу свою приявши, душею твоею в горния обители райския востекла еси, идеже со Ангелы и всеми святыми сладце поеши Богу: Аллилуиа.
Новый живот вечный прияла еси, богохвальная, егда страдальческою кончиною от плоти разрешившися, на брак Небеснаго Жениха возшла еси, Егоже молящи не престай за ны, грешныя, любовию страдания твоя чествующия и глаголющия присно:
Радуйся, мученическое течение твое мечною кончиною увенчавшая.
Радуйся, тем главу невидимаго змия стершая.
Радуйся, во гласе пения ангельскаго на небо душею твоею воспарившая.
Радуйся, мученический лик на небесех возвеселившая.
Радуйся, постнический полк возрадовавшая.
Радуйся, девственнаго сонма веселящее украшение.
Радуйся, постническое житие и мученическую кончину в себе сочетавшая.
Радуйся, и нас о добродетелех ревновати подвизающая.
Радуйся, свято и непорочно на земли пожившая.
Радуйся, идольскую лесть обличившая.
Радуйся, демоны посрамившая.
Радуйся, мучителю помысл покаяния вложившая.
Радуйся, преподобномученице Христова, Параскево всеславная.
Странно есть неверным видети, како от единаго молитвеннаго призывания имени твоего святаго, Параскево многострадальная, недужным исцеления подаются и духи нечистии от человек отбегают, нам, грешным, тебе в помощь призывающим и поющим Богу: Аллилуиа.
Икос 8
Вся Церковь Христова честная страдания твоя, святая и всехвальная преподобномученице, прославляет, исцелений же благодать от тебе приемлет и радостно взывает ти глаголюще:
Радуйся, в житии и по смерти многими чудесы прославленная.
Радуйся, дары целебныя независтно подающая.
Радуйся, любящим и чтущим тя любовию сугубою воздающая.
Радуйся, во благих прошения наша скоро исполняющая.
Радуйся, в недузех страждущия благодатно посещающая.
Радуйся, неисцельныя болезни скоро исцеляющая.
Радуйся, обиды терпящим помощь дарующая.
Радуйся, душевныя страсти побеждати помогающая.
Радуйся, яко на подвиг долготерпения твоего зряще, малодушия нашего устыждаемся.
Радуйся, яко мужество твое воспоминающе, воинствовати на плоть подвизаемся.
Радуйся, в животе твоем многия люди просветившая.
Радуйся, по преставлении твоем множайшия роды во благочестии утвердившая.
Радуйся, преподобномученице Христова, Параскево всеславная.
Вси Ангели небеснии и святых лицы радостно тя, преподобномученице, сретоша, егда во врата Царствия Небеснаго восшла еси, во еже мзду твоим подвигом и страданиям от Господа прияти. Убо и нам, недостойным, наследие вечное со святыми испроси, молящи, да сподобит нас Господь купно с тобою пети Ему во Царствии Небеснем: Аллилуиа.
Витийство человеческое не довлеет, во еже по достоянию тя, Параскево всеблаженная, прославити, обаче любовию твоею побеждаеми, приносим ти хваления сицевая:
Радуйся, со Христом вечно царствуюшая и о нас Его умоляющая.
Радуйся, дары Его Божественныя молитвами твоими щедро нам подающая.
Радуйся, кающимся снизхождение.
Радуйся, подвизающимся благое наставление.
Радуйся, от горних высот к земнородным милостиво приникающая.
Радуйся, искушения демонская молитвою твоею отражающая.
Радуйся, ветвь победную от Господа приявшая.
Радуйся, ум наш горе возносящая.
Радуйся, призывающим тя помощь невидимо подающая.
Радуйся, Ангелом прореченная.
Радуйся, и собеседницею Ангелов явившаяся.
Радуйся, преподобномученице Христова, Параскево всеславная.
Спастися молящимся ти пособляеши, святая преподобномученице, и с верою приходящим в храм твой святый дары благодатныя присно подаеши, и всякое во благих прошение наше скоро исполняеши, яко дерзновение велие ко Христу Богу стяжавши, Емуже радостно поеши победную песнь: Аллилуиа.
Стеною молитв твоих, преподобномученице, от всякаго искушения диавольскаго нас огради, да не порадуется враг падениям нашим, но тобою крепко да посрамится в нас, хвалебно зовущих ти:
Радуйся, по Бозе и Богородице крепкое наше упование.
Радуйся, непостыдное в бедах предстательство.
Радуйся, в соних и видениих верныя посещающая.
Радуйся, и неверным дары целебныя милостиво подающая.
Радуйся, звездо Божия благодати, еюже мрак от нас прогоняется.
Радуйся, чудес пучино, всех нас неоскудно напояющая.
Радуйся, воздержанием древней Иудифи уподобившаяся.
Радуйся, мужеством сию превозшедшая.
Радуйся, яко Христовы мироносицы, Христа возлюбившая.
Радуйся, Тому верная в мучениих своих пребывшая.
Радуйся, по глаголу Его прославленная.
Радуйся, Того выну лицем к лицу созерцающая.
Радуйся, преподобномученице Христова, Параскево всеславная.
Пение наше хвалебное не довольно есть к прославлению многих и предивных чудотворений твоих, святая преподобномученице, обаче, яко благая и милостивая Христова подражательница, благосердием твоим на нас, грешных, воззри, и святыми и благомощными твоими молитвами ко Господу мир душевный нам испроси, во еже взывати Богу: Аллилуиа.
Светлыми лучами чудес немерцаемо сияеши, Параскево богохвальная, вся же благочестно жити хотящия благодатно к незаходимому Солнцу правды Христу Богу путеводиши, зовущих ти сице:
Радуйся, целомудрия цвете драгий и прекрасный.
Радуйся, мировместилище, ароматы райскими преисполненное.
Радуйся, от исполнения твоего и нам дары благодатныя неискудно источающая.
Радуйся, доблестная исповеднице Христова, благодатию облеченная.
Радуйся, во смирении твоем на небеси и на земли дивно возвеличенная.
Радуйся, нищетою временною богатство нетленное стяжавшая.
Радуйся, о Царствии Божием плач духовный выну явльшая.
Радуйся, в мучениях телеси своего плачу не предавшаяся.
Радуйся, кротостию языка твоего Христу подражавшая.
Радуйся, правды Его алкавшая.
Радуйся, о пище тленней Его ради забывшая.
Радуйся, милость Божию и на неверных молитвою твоею призывавшая.
Радуйся, преподобномученице Христова, Параскево всеславная.
Благодать Господня молитвами твоими источнику воды от лет древних даровася, темже и храму Божию со обителью дев создатися тамо во имя твое благоволила еси. Сию убо выну присещай и не забуди духовных чад твоих, в преподобии тебе подражати хотящих и поющих Богу: Аллилуиа.
Поюще твоя подвиги, и страдания, и многая чудеса твоя, святая и всехвальная Параскево, молимся ти прилежно: молися о нас к прославльшему тя Владыце, о еже избавитися нам от погибели вечныя, часть же спасаемых улучити, благодарно зовущих:
Радуйся, венценосице, от руки Христовы увенчанная.
Радуйся, чистотою сердца Боговидения сподобившаяся.
Радуйся, многия люди, Христу тобою уверовавшия, Богу примирившая.
Радуйся, ненависть от человек Христа ради приявшая.
Радуйся, страшныя муки Его ради подъявшая.
Радуйся, со светлою свещею на брак Жениха Небеснаго пришедшая.
Радуйся, свеще Божия ревности, елеем милости исполненная.
Радуйся, души наша мастию Духа Святаго, в тебе живущаго, умащающая.
Радуйся, дщерь благословенная Отца Небеснаго.
Радуйся, яко мзда твоя многа на небеси.
Радуйся, яко молитвы твоя действенны на земли.
Радуйся, яко силы твоея трепещет преисподняя.
Радуйся, преподобномученице Христова, Параскево всехвальная.
О святая и многострадальная преподобномученице Параскево! Приими милостивно моление сие наше, и умоли Святую и присно покланяемую Троицу избавити нас от мучений вечных, и сподобити вкупе с тобою Царствие Небесное улучити, и выну Создателю нашему пети: Аллилуиа.
О святая и многострадальная преподобномученице Параскево! К тебе, аки теплей за ны к Богу молитвеннице, припадаем и прилежно молимся: умоли Господа и Владыку нашего пробавити милость Свою к нам, недостойным рабом Его, даровати же нам душевное и телесное здравие, земли плодоносие, воздуха благорастворение, во благочестии христианстем преуспеяние, к житию временному нужная и довольная, и вся ко спасению потребная, да мирно и благочестно поживше, сподобимся благую кончину христианскую улучити и Царствие Небесное наследити. Ей, предстательнице наша благая! Не посрами упования нашего, еже по Бозе и Пресвятей Богородице на Тя возлагаем, но буди нам ходатаица во спасение, да сподобимся вкупе с тобою и всеми святыми в радости блаженства вечнаго славити в твоем заступлении великую милость Бога нашего, Отца и Сына и Святаго Духа, ныне и присно и во веки веков. Аминь.